«Рыбы» Міхаіла Рубіна на ўласную мелодыю

Главное Автор Жанна Жалевич Опубликовано 05.06.2022

А ці ёсць увогуле — гэта агульназразумелая рэчаіснасць? А мо кожны мае толькі асабістыя ўражанні і па іх будуе ўласную карціну?

«Не люблю я цэтлікі розныя. Раблю душой, а не розумам» — М. Рубін

Нядаўна вядомаму ў Віцебску паэту, музыканту і педагогу споўнілася  45. Цудоўны ўзрост. Збольшага сябе ўжо зразумеў, а наперадзе яшчэ доўгі жыццёвы шлях і новыя гарызонты для творчасці.

У сем гадоў Міхась прыйшоў у Рубаўскую музычную школу, каб навучыцца іграць на фартэпіяна, заадно і гітару асвоіў.

А потым скончыў Віцебскае музычнае вучылішча. Дзе яму пашчасціла сустрэцца з цудоўным педагогам Анатолем Іванавічам Церашам.

Эстраднае аддзяленне Інстытута культуры дадало новыя веды і творчыя знаёмствы.

Але аркестр музычнага вучылішча пад кіраўніцтвам Цераша — гэта альма-матэр Міхаіла Рубіна.

Першым праектам стаў  музычны гурт «Фу», які праіснаваў з 1993 па 2006 гады, сённяшні  Рубін лічыць яго самымі уплывовым.  Гаражны праект 2009 года — «Кубік Рубіна» стаў працягам тэмы.

Творчае жыццё музыкі за апошнія дваццаць гадоў было напоўнена разнастайнымі творчымі з’явамі: фестывалямі, конкурсамі і згуртаваннямі.  Сярод іх і праца з народнымі калектывамі «Кантраст» і «Экспромт», і з калектывамі музычнай школы, і праца з клезмерскім ансамблем «Аідышэ Нішоме», і ўдзел у фестывалях традыцыйнай яўрэйскай музыкі ў Менску, Кіеве, і Пецербурзе.

«Віцебскі лістапад» і конкурс «Бардаўская восень», тэатр-студыю аўтарскай песні «Віцебск» — немагчыма ўявіць без удзела Міхаіла.

У траўні з вялікім поспехам на сцэне КЗ «Віцебск» адбыўся  міні фестываль «Рубін-Фэст», які нарадзіўся ў 2016 годзе.

Спачатку гэта быў трыб’ют, дзе выконвалі песні Рубіна. А ў гэтым годзе ён набыў абрыс творчай вечарыны. Традыцыйна ў фестывалі прыняў удзел панк-рокер Мікіта Гушчанка, а харэаграфічнасць дзейству дадаваў маладзёжны тэатр «Кола».

З 2018 года Рубін робіць эксперыментальна-электронны праект «NUBIR». Гэта крыху гісторыі. Сам аўтар сказаў наконт свайго мінулага, што гэта было, але зараз цікавей тое хто ён ёсць у сучасным.

«Калі ў цябе нешта атрымалася ў 25 і ты жывеш гэтым — то лічы, што ты памер як творца»

Так кажа Міхаіл Рубін:

«Музыкай я займаюся з сямі гадоў.  Аднак, яна стала для мяне цікавай толькі тады, калі з’явілася магчымасць рабіць нешта сваё. Але, калі ты нешта выдумляеш — ты штораз робішся іншым.

Я тады гэта яшчэ не ведаў. Зараз ведаю. Я мяняюся пастаянна. Бо, калі ў цябе нешта атрымалася ў 25 і ты спрабуеш гэта паўтарыць — гэта твой канец як творцы.

Так вось пафасна, даруйце. Я пішу музыку, пішу вершы і пішу песні. Гэта ўсё вельмі рознае. Але зараз падыход мой амаль адзін: і верш, і нейкі твор я магу агучыць адразу ў дыктафон. Вядома, потым карэктырую.

У 21-22 навучальным годзе ў мяне было вельмі шмат вучняў. Я баяўся, ці хопіць мяне на іншае?

Вучні + складанасці + няспынны пошук . І вось яна — мая «схема невычарпальнасці».

Часам я пішу дзецям песенькі на ўроках. Шмат каго з іх гэта дадаткова матывуе. Яны — дзеці, вельмі ўсе розныя і таленавітыя, і звычайныя. Кожны нешта атрымае ад мяне. Стараюся даць максімум. Прыходзіцца быць адкрытым. А творца не можа быць адкрытым напоўніцу.

Можа ці не можа быць адкрытым творца я не ведаю. Але ўбачыла на мінулым Рубін-Фэсте і  на аўтарскім канцэрце  Рубіна ў Чацвёртай музычнай школе,  расхінутую ў шчырай размове душу аўтара.

Песні-балады пад гітарныя акорды — гэта пра тое, што ў сэрцы і галаве. Тут адносіны да жыцця і адчуванні. У іх ёсць усё: і жорсткасць сучаснага, і лірычны смутак, і гумар, і боль, і радасць . Гэта не змястоўныя гісторыі.  Гэта стэк скульптара, які высякае музычны рытм пад характэрныя словы.

У мяне ўзнікла думка, што блюз, рок, джаз, які абгортвае тэксты, стварае абстрактны рэалізм — мастацкае ўвасабленне жыцця.

Большасць твораў Рубін піша на свае вершы. Але ёсць і «амузычаныя» вядомыя рускія паэты «срэбранага веку» — Хадасевіч, Ясенін, Аненскі і вядомыя беларускія паэты — Колас, Багдановіч, Барадулін і сучасныя імены — Бурлак, Плотка, Ляшкевіч.

На канцэрце прагучала некалькі твораў на вершы Віктара Жыбуля.

Жыбуль — паэт, які піша ў стылі паэтаў-аберыўтаў. (Згуртаванне рускіх паэтаў 20-х гадоў мінулага стагоддзя).

Менавіта «аберыўты» паўплывали на творчасць Рубіна. Для іх галоўнае — гратэск, алагізм і эмоцыі:

«Яшчэ існуе перакананне, што ў песні павінна быць нейкая гісторыя. Але ж гэта толькі адзін з магчымых падыходаў. Словы — гэта як «рыбы» для мелодыі. Аднак, я пішу іх раней за музыку. І яны вельмі важныя для мяне. Вядома, як і валоданне інструментам, гармонія твора і г.д.

Мае тэксты досыць асацыятыўныя. Музыка робіць іх іншымі. Любы выпадковы акцэнт мяняе ўсё. Аднойчы я вырашыў для сябе, што музыка раскрывае сэнс маіх сказаў»

 

«Дзеці не шукаюць сэнс. Яны проста слухаюць»

Тэксты Рубіна — складныя, калі вы намагаецеся падагнаць пад звычны шаблон і простыя, калі зразумець пачуцці. Іх трэба слухаць адключыўшы штучныя і немаведама кім усталёваныя стандарты.

Непасрэднасць — галоўнае, што адрознівае дзіця ад дарослага. Хочаш даведацца ісціну будзь нетрывіяльным як дзіця. Дзеці ўсё разумеюць шчыра і незалежна. І,здаецца, менавіта яны лепей разумеюць творы свайго настаўніка.

Цікава было даведацца ў чалавека, які болей за дваццаць гадоў прысвяціў музычнаму выхаванню дзяцей пра тое, якія яны — дзеці XXI стагоддзя:

«Сучасныя дзеці – добрыя. Яны прыходзяць вучыцца і да кожнага можна знайсці падыход. Я не раблю з іх герояў класічнай гітары. Шчыра кажучы, я і гітарыст не класічны. Але амаль кожны дзіцёнак нешта знойдзе на маіх занятках і мы абавязкова  пасябруем і, як мінімум, знойдзем разуменне».

А яшчэ ў мяне ўзнікла пытанне чаму аўтарская песня = гітара? Мо таму, што гітара зручны інструмент, ці нешта яшчэ?

Міхаіл, вы — мультыінструменталіст, а чаму вашы тэксты часцей за ўсё афарбаваны  гітарнымі струнамі?

— Цікавае пытанне. Напэўна таму, што гітара не перашкаджае маім думкам. Яна не імкнецца быць лепшай. Гэта мая поліфанія — злучэнне зусім рознага: слоў і музыкі.

А мне са знаёмствам з Рубіным пашчасціла зрабіць адкрыццё — аказваецца ў нас ёсць сур’ёзная сучасная музыка. Прафесійная і якасная.

Мо, калі небудзь, потым «славянска-базарны» Віцебск стане вядомым сучаснай музычнай культурай. Сучаснае мастацтва з Шагалам і Малевічам — гэта ж візітная картка нашага любімага горада.

Мо і не потым. І не ў іншым жыцці…

Источник: vkurier.com